Liverpool kuri final ya Champions ligue inyuma y’ugukora ibidasanzwe !

Umurwi wo mu Bwongereza wa Liverpool,waraye ukoze ibitangaza mu gutsinda umurwi wa Fc Barcelona ibitsindo 4 ku busa mu rukino rw’ugusubiriza n’ aho mu rukino rwa mbere Barcelona yari yatsinze Liverpool ibitsindo 3 ku busa.

Ivyo vyabaye ku munsi wa kabiri uheze itariki 7 rusama 2019 aho isaha zitatu z’ijoro ku kibuga c’umurwi wa Liverpool hari hategekanijwe urukino rw’ugusubiriza muri kimwe ca kabiri (demi final) ca Champions Ligue.Umurwi wa Liverpool wasabwa kugaruza ibitsindo 3 wari watsinzwe na Fc Barcelona mu rukino rutangura.Imbere y’uru rukino benshi mubasesengura umupira babona bidashoboka ko Liverpool ibandanya kiretse ibidasanzwe none ibidasanwe vyabaye.

Umurwi wa Liverpool udafise Salah na Firmino ukaba washoboye gutsinda Barcelona ubifashijwemwo na Georginio Wijnaldum na Divock Origi batsinze ibitsindo bibiri bibiri.Ku kibuga ca Anfield ,Liverpool yatanguye urukino neza isatira.Ku munota w’indwi,kw’ikosa rya Jordi Alba,Sadio Mane yafashe umupira aca ahereza Jordan Henderson atuma Ter Stegen agira parade ariko kuko Origi yari hafi aca aratsinda igitsindo ca mbere ca Liverpool.Ico gihe igihunga cabaye cinshi ku ruhande rwa Barcelona itumva ukuntu Liverpool yariko irayisatira ariko Barcelona yaje irasatira ariko umunyegori wa Liverpool Alisson Becker avyifatamwo neza ivyo vyabaye nko ku minota ya 14 ;18 ;45+4 ;51 na 68.Ariko na Ter Stegen wa Barcelona hari imipira yakuyemwo nko ku munota w’7 ;9 na 23.Igice ca mbere kikaba caheze ari 1 ca Liverpool ku 0 bwa Barcelona.

Origi atsinda igitsindo ca mbere

Mu gice ca kabiri,umukinyi Andrew Robertson yari yavunitse yakuwemwo hinjizwa Giorgio Wijnaldum.Georgio Wijnaldum akaba yatsinze igitsindo ca kabiri n’ica gatatu ku minota ya 54 na 56 ibintu bica bisubira ibubisi abakinyi n’abafana ba FC Barcelona bamera nk’abakubiswe n’inkuba.Ku munota wa 79 mu gihe Liverpool yari ironse corner umwongereza Alexander Arnold yagomba areke Shaqiri ayitere ariko mu buryo butangaje,Arnold yabonye Origi ahagaze wenyene muri mukore umbone(Surface de réparation) aca afata ingingo y’ukuyitera vuba cane Origi aca aratsinda igitsindo ca kane urukino rukaba rwarinze ruhera uko.

Origi atsinda ica kane

Umurwi wa Barcelona bikaba atari ubwa mbere ikuwemwo gutyo kuko no mu mwaka uheze wa 2018 umurwi wa AS Roma ukaba warawukuyyemwo uyitsinze 3 ku busa mu gihe mu rukino rubanza Barcelona yari yatsinze Roma 4-1.Ikaba iheruka iki gikombe mu 2015.Iyi ntsinzi ya Liverpool yibukije kandi abakunzi bayo urukino rwa nyuma mu nkino nk’izi rwabereye i Istambul muri Turquie rwari rwawuhuje na Milan AC aho mu minota mike cane uwo murwi wa Liverpool wagaruje ibitsindo 3 uca utwara igikombe.

Urukino rwa nyuma rukaba ruzoba itariki 1 ruheshi 2019,rukazohuza umurwi wa Liverpool n’umurwi uza gutsinda hagati ya Ajax d’Amsterdam na Tottenham ,rukazobera mu gisagara ca Madrid muri Espagne ku kibuga ca Estadio Metropolitano, ikibuga gisanzwe gikinirako umurwi wa Atletico Madrid.