Abakinyi batsinze ibitsindo vyinshi mu mateka y’igikombe ca Afrika CAN

Mu gihe umurwi nserukira gihugu w’uburundi Intamba mu Rugamba uriko uritegura gukina inkino z’igikombe ca Afrika CAN no mu  ntumbero z’ukubandanya tubashikiriza bimwe mu vyaranze ico gikombe , uno munsi tukaba twahisemwo kubashikiriza abakinyi batsinze ibitsindo vyinshi muri rusangi muri izo nkino.

1.Samuel Eto’o afise ibitsindo 18

Samuel Eto’o n’umukinyi akomeye yakiniye umurwi wa Cameroun no mumirwi ikomeye itandukanye ku mugabane wa buraya nka FC Barcelona ; Inter de Milan ; Chelsea n’iyindi . Akaba ariwe mukinyi yatsinze ibitsindo vyinshi mu gikombe ca CAN kuko yatsinze 18 mu nkino zose yakinye.

Eto'o yaranabaye Capitaine wa Cameroun

2. Laurent Pokou yatsinze ibitsindo 14

Laurent Pokou yari umukinyi w’umunya Cote d’Ivoire yakina ku ruhande rw’abasatirizi.Akaba yakinye mu myaka ya za 60 na za 70.Niwe aza ku mwanya wa kabiri mu batsinze ibitsindo vyinshi mu mahiganwa ya CAN kuko yatsinze 14.Yatsinze ibitsindo 6 muri CAN ya 1968 yongera atsinda ibitsindo 8 muri CAN 1970.Pokou akaba yarabaye umumenyereza.Yitavye Imana mu 2016 afise imyaka 69.

Pokou ariko akinira Stade Rennais yo mubufaransa

3.Rashidi Yekini yatsinze ibitsindo 13

Rashidi Yekini yari umukinyi w’umusatirizi w’umunya Nigeria yari akomeye mu myaka ya za 90 kuko yabaye umukinyi yatsinze ibitsindo vyinshi muri CAN 1992 aho yatsinze ibitsindo 4, no muri CAN 1994 aho yatsinze ibitsindo 5.Muri rusangi yatsinze ibitsindo 13 muri ayo marushanwa ya CAN.Akaba yaritavye Imana mu 2012 afise imyaka 48 .

Yekini bamwe bavuga ko yitavye Imana akiri muto

4.Hassan El-Shazly yatsinze ibitsindo 12

El-Shazly yari umukinyi asatira w’umunya Misiri,akaba yari akomeye mu myaka ya za 60 mbere ni we yatsinze ibitsindo vyinshi muri CAN 1963.Ibitsindo vyose hamwe yatsinze muri CAN ni 12.Akaba yaritavye Imana mu 2015 afise imyaka 72.

Hassan El-Shazly

5.Patrick Mboma,Didier Drogba na Hossam Hassan bafise 11

Patrick Mboma yari umusatirizi w’umunya Cameroun yari akomeye mu myaka ya za 90 no mu 2000 akaba yarabaye mu batsinze ibitsindo vyinshi muri CAN 2002(3) na CAN 2004(4).Ubu akaba asesengura umupira w’amaguru ku mboneshakure ya Canal plus.

Patrick Mboma

Mboma akora kuri Canal+

Didier Drogba nawe yari umusatirizi w’umunya  Cote d’Ivoire yari akomeye mu myaka iheruka akaba yari mu batsinze ibitsindo vyinshi muri CAN 2012.

Didier Drogba

Hossam Hassan yari umusatirizi w’umunya Misiri yari akomeye mu myaka ya za 90.Yari umwe mu binjije ibitsindo vyinshi muri CAN 1998 aho yatsinze 7.

Hossam Hassan

Abandi batsinze ibitsindo vyinshi

Umunya Cote d’Ivoire Joel Tiehi, umunya Tunisie akomoka muri Bresil Francileudo Santos,umuzayirwa Pierre Ndaye Mulamba n’umunya Zambiya Kalusha Bwalya batsinze ibitsindo cumi

Umunya Angola Manucho,Umunya Cote d’Ivoire Abdoulaye Traore n’umunya Ethiopie Mengistu Worku batsinze ibitsindo icenda.

Abanya Misiri Taher Abouzaid na Ahmed Hassan,umunya Guinnee Pascal Feindouno n’umunya Mali Seydou Keita batsinze ibitsindo umunani.

Umunya Afrika y’Epfo Beni McCarthy,umunya Angola Flavio Amado,umunya Misiri Ali Abo Greisha,umunya Ghana Assamoah Gyan,umunya Ghana Osei Kofi,umunya Mali Frederic Kanoute,umunya Nigeria Jay-Jay Okocha n’umunya Zambia Chris Katongo bafise ibitsindo indwi.

Abafise ibitsindo bitandatu ni Lakhdar Belloumi wa Algerie ;Shoun Bartlett wa Afrika y’epfo;Roger Milla wa Cameroun;Jean Michel Mbono wa Congo Brazza;Mohamed Aboutrika wa Misiri;Luciano Vassalo wa Ethiopie; George Alhassan wa Ghana;Wilberforce Mfum wa Ghana ;Abedi Pele wa Ghana;Ahmed Faras wa Maroc;Segun Odegbami wa Nigeria Mayanga Maku wa Zaire na Djkasa wa Soudan.

Mwomenya k’umukinyi yatsinze ibitsindo vyinshi mw’ihiganwa rimwe rya CAN ari umunya Zaire Pierre Ndaye Mulamba aho muri CAN 1974 yashoboye gutsinda wenyene ibitsindo 9.Ivyo akaba ata wundi mukinyi arabigira muri CAN.

Tukaba rero twipfurije Intamba mu Rugamba kuzokwitwara neza muri CAN mbere tukanaronka n’abakinyi batsinda ibitsindo vyinshi muri iryo higanwa.